2017年9月20日 星期三

Bitcoin風暴背後

http://hk.apple.nextmedia.com/financeestate/art/20170919/20157269

今年2月最後一個交易日對Bitcoin有象徵意義,因為一個Bitcoin價格正式超過一盎士黃金。唔少人驚問:呀哥,虛擬嘢嚟,點會貴過黃金?到今年8月,一個Bitcoin已超過5,000美元,比2月底價格升近4倍。但5,000美元已係近期個頂,近日內地掀起數字貨幣監管風暴,Bitcoin一度跌穿3,000美元。據內地媒體報道,火幣網、OKCoin負責人現時已不得離開北京。

繼內地最大的數字貨幣交易平台比特幣中國停止營運後,第二及第三大的交易平台火幣網和OKCoin分別公告,表示將停止所有虛擬貨幣交易業務。至此中國三大數字貨幣交易平台相繼停止業務,數字貨幣在中國嘅發展終結?其實正正相反。

海耶克晚年最後一本經濟學著作,叫做《貨幣的非國家化》。如果經濟學家們相信自由競爭係最好,咁貨幣發行亦應該自由競爭,唔應該由央行統一發行。海耶克當日提出呢個構想時看似天方夜譚,但其構想今日開始見到眉目,也就係數字貨幣的出現。

數字貨幣一個重心係去中心化,每個人只要有部電腦就可以挖礦。但貨幣非國家化,衝擊政權控制貨幣之權力,就好似叫獨裁國家實行民主,當然唔會畀你咁順攤發展。中國嘅做法係如果有得做就我攬嚟做,當數字貨幣發展如火如荼之際,交易平台被下令關門,也意味着由央行自己搞嘅數字貨幣將要出現。

科技發展會改變我哋嘅生活形態,但新科技能否風行,還要時勢配合。最典型例子是平板電腦,第一部出現於1989年,然而硬件、軟件、網絡各方面跟唔上,平板電腦好快便成為失敗產品。2000年後平板電腦再出現,硬件、軟件、網絡各方面已經配合,結果順勢發展飛快。海耶克嘅構想冇錯,只係其思想比同時代嘅人早了40年。

人民幣短期見頂

http://hk.apple.nextmedia.com/financeestate/art/20170912/20150210

人民銀行公佈自2017年9月11日起,外滙風險準備金率下降至0%。由2015年811滙改開始,全世界睇人民幣跌。所以該年8月31日,人民銀行將外滙風險準備金率由0%一下提高至20%。所謂外滙風險準備金率,即係當有客同銀行買遠期外滙時(主要係美元),銀行要留20%外滙做準備金。呢20%可以係銀行現價買定,可以喺市場上借入,但無論用咩方法都代表銀行有利息成本。好自然地,銀行就會將成本轉嫁畀客,也就係遠期兌換價唔靚仔。

人民幣貶值預期出現時,大陸主要做三樣嘢:其一係挾拆息,離岸市場久唔久挾到過百釐殺晒淡友,反覆三幾次後等你唔敢沽。但呢種做法只能偶爾為之,反作用力好大。其二喺遠期美元落手,利用遠期美元令當下嘅外滙佔款表面睇落冇跌,等人以為大陸走資已經告一段落。其三即上述外滙風險準備金率,人民幣貶值時個個想換外滙,透過提高銀行成本令遠期外滙價唔靚,削弱人買外滙意欲。

今浪人民幣兌美元由6.9升到6.45,升近7%,唔係人民幣轉升,而係美元轉弱。美滙指數由103跌到91已經11%,從比例可見人民幣並無跟足升11%。美元轉弱主要來自聯儲局出現史無前例嘅大變動,聯儲局理事目前會有三個空缺,副主席費希爾剛剛又話劈炮唔撈,令7名理事出現4個空缺,加埋主席耶倫明年任期屆滿。輿論認為有利特朗普推自己人上,如果係咁都還好,起碼明確。可是特朗普自己白宮幕僚都保唔住,聯儲局容得下佢插手?存疑。正是這種不確定性令美元轉弱,但從技術走勢而言美滙指數91係觸底位,開始反彈機會很大。另聽朋友講,人民幣貶值期間,USD/CNY Capped Forward好賣得,唔少價位簽定在6.35以上,值得留意。

金正恩強國野心

http://hk.apple.nextmedia.com/financeestate/art/20170905/20143399

朝鮮導彈射得遠還是中國導彈射得遠?朝鮮核技術成熟定中國核技術成熟?如果美國視朝鮮擁有核武為威脅,枱底下無可能唔對中國防一手。金正恩,或說朝鮮軍政高層對此情勢當然十分了解,因此嚟一次鬥大膽遊戲,游刃於此情勢之間,如果成功,有望步向強國之路。

美國在東北亞盟國部署防禦朝鮮嘅軍備,今日可以防朝鮮,聽日可以用嚟防中國。但美國同中國經貿千絲萬縷,中國亦持有大量美債,如果擺明車馬話要插旗防中國太難睇,因此朝鮮嘅軍事威脅就需要存在。金正恩就係睇準呢個空間,順勢加快發展核武同長程導彈技術。

一場時間競賽,美國在盟國插旗,要傾要講,唔係通行無阻。在討價還價期間,朝鮮加速發展核技術。如果在美國完成部署前,朝鮮先完成核技術發展,到時就吹金正恩唔脹。

因此美國嘅底線係朝鮮核技術唔可以太成熟,以及其洲際導彈技術唔可以射到美國。在接近上述情勢前,開戰機會唔大,但戰爭離我哋越來越近。朝鮮奉行先軍政治,即無論如何軍事優先。但是常規軍備要教育同錢長期積累研發,朝鮮冇呢個本錢。在金正恩角度,餘下的唯有非對稱戰略一途。

五十年代韓戰同台海危機期間,美國曾兩度以核武威嚇中國。毛澤東意識到如果無核武始終要睇人面色,於是開始發展核武。核武係用嚟靠嚇,因為擁有核武代表可以同對方攬炒。毛澤東明白,金正恩也明白,此為非對稱戰略最重要一步,今時今日另一重要手段則係黑客。
金正恩想走中國六十年代舊路,先以核武奠定朝鮮,或說金家嘅國際地位,然後再諗發展經濟等問題。

佢不甘於朝鮮只作為一個附庸國,要嘅係能夠同他國並起並坐的地位。金家皇朝最後會倒台,還是會開闢出一條新徑,十年內我哋應該會見證。

石油新周期將至

http://hk.apple.nextmedia.com/financeestate/art/20170829/20135999

世界上有兩壇生意經營上可以由私人公司管,但大方略要國家級先玩得起,一個為軍火,另一個為能源。所以任何經濟解釋都嘥氣,長期還看政治。美國快則2018年,慢則2020年會成為原油出口國,呢個佈局並唔會因為特朗普做唔做總統而改變。要賣嘢,最理想當然係件貨賣到有咁貴得咁貴。

據國際能源署數據,石油輸出國組織(OPEC)佔全球原油產量42%。在實物供需上,OPEC掌握定價權。但在金融操作上,美國掌握期貨定價權。兩者之較量在於,期貨可以快速決定邊際價格,即最後一口價就係市價;可是去到最後還要看實物供需,否則會出現有價冇市或有市冇價情況。

OPEC自己估計,全球原油需求嘅邊際產量係每日100-150萬桶,因此只要齊心減產100萬桶,原油供需就大致平衡,唔會因供過於求令油價下跌。另一邊廂,美國今年2月、3月平均每日出口110萬桶及83萬桶原油,剛好抵銷OPEC減產量。一個基本概念要先明白,美國一直都係產油大國,只係過去產油自己都唔夠使,直到頁岩油技術出現後,美國先開始產油多到夠出口。因此過去國際上原油嘅賣家市場,美國無份。

面對OPEC和俄羅斯坐住42%及14%國際原油市場份額,美國要食呢口大茶飯,就必須要令你撕裂。只有產油國之間出現撕裂,美國先有空間插針。最好方法就係令油價大跌,當跌到大家頂唔順,就會有人唔想守協定。油價大跌逼使原油坐莊國減產,呢個就係空間。

技術走勢上,油價由過百美元腰斬兩次,跌到24蚊已見底。之後非常容易反彈一個開到50蚊並盤底兩三年。現時為盤底期,新底位估計40蚊左右,好難再見3字頭。由40-50蚊間繼續徘徊,逢見油價逼近40蚊便可考慮收集等新周期趨勢。

301貿易戰真相

http://hk.apple.nextmedia.com/financeestate/art/20170822/20129201

過去經常會聽到一種說法:中國13億人口,只要喺每個人身上賺1蚊,你就有13億元。誠然,環顧全球市場要有咁多人,又要有啲錢買嘢嘅,除中國外搵唔到第二度。因此國際間所有對中國之貿易戰,要你開放市場係本,真係開打係末。此為問題之本質。

8月18日,美國宣佈根據《1974年貿易法》第「301條款」,正式對中國展開調查。調查重點在知識產權及技術轉移,包括四方面。其一,中國政府有冇利用合資等手段,強迫美國企業將技術轉移畀中國公司;其二,中國政府有冇通過發放牌照等方式,強迫美國企業轉讓技術;其三,中國政府有冇幫中國公司藉併購手段,獲取技術轉讓;其四,中國政府有冇支持黑客,入侵美國商業機構電腦盜取知識產權及商業機密。以上四點,將佢反轉去睇就明白。因此特朗普真正嘅含意,係我將來嚟中國做生意,唔好再焗我轉讓技術。

1974年係乜嘢日子?就係布雷頓森林體系瓦解,美元仆直嘅時候。所以美國當時推出《1974年貿易法》,透過調查判定他國有否不公平的貿易行為,再實行貿易壁壘抵制。最終目的係令入口貨貴,美國本土貨平,減低貿易赤字,挽回美元信心。《1974年貿易法》有被動及主動條款,122及201條為被動條款,301條為主動條款。後來因WTO成立,1995年後有301調查,冇制裁,但調查往往已足夠讓對方妥協。

今時唔同往日,中美經貿緊密,唔少中國公司內含美國股權,反之亦然。中國資本已擴散為美國企業一部份,要切除很難,貿易戰只會如電療自傷。以某些中國品牌手機為例,美國CPU,韓國面板,台灣RAM,日本喇叭等。一旦玩關稅,那是制裁中國還是制裁韓台日?


2017年8月15日 星期二

朝鮮印度虛實之爭

http://hk.apple.nextmedia.com/financeestate/art/20170815/20121912

先講結論。近期全球股市都呈跌勢,唔少睇法認為,因為可能會打仗。如果係打仗引發嘅跌市,往往打完甚或一開打,股市就倒升。所以地區戰爭引發嘅跌市唔使驚,要驚嘅,係今次跌市唔關打仗事。

印度、朝鮮相繼觸發地緣局勢緊張,剛好一個在中國西南面,一個在東北面,形成對角。戰線如此長,往往意味着,兩者中一個係虛,一個係實。朝鮮估計係虛,主要原因在於南韓薩德系統未完成部署,美國將來仍要賣薩德系統畀日本。如果金正恩太早倒台,朝鮮局勢平靜,各國要薩德系統嚟把鬼?因此軍火生意要成,金正恩就需要存在。

美國忌憚的是北韓導彈發射距離一次比一次遠,過去話要射到去美國得啖笑,難保將來技術逐漸成熟。軍事專家估計,北韓剛試射的「火星14型」導彈,若以正常彈道飛行,射程最遠達6,700公里,可覆蓋美國阿拉斯加州全境。故北韓導彈技術快成熟之時,或許就是金正恩真正倒台嘅時候。

另一邊廂的印度卻恐怕係實。同北韓相反,北韓大大聲嗌,印度靜靜雞做。印度官方於公開場合講嘢不強硬,暗示有偈傾,但低調地增兵。包括陸軍33軍第17、27和20山地師,每個師兵力1萬至1.5萬人;第3軍和第4軍,旗下各有3個山地師或步兵師,亦向中印邊境集結。雖然印度經濟實力同中國有差距,不要忘記,據斯德哥爾摩國際和平研究所報告,印度2012至2016年對外採購武器金額佔全球13%,係全球第一大武器採購國。

印度在賭一樣嘢:十九大前共產黨內鬥周身唔得閒,中國其實唔想開戰。同時,中國不斷宣稱和平崛起,若在一帶一路沿線因爭議地區開戰,周邊國家會驚。洞朗的戰略意義對印度小,一帶一路戰略意義對中國大,以小換大,賭得過。故今次印度求戰之心,不宜小看。

中印之爭9月關鍵

http://hk.apple.nextmedia.com/financeestate/art/20170808/20115022

翻開地圖看今次中國和不丹爭議之地洞朗,會發現一個有趣形勢。印度通往錫金要經過西里古里走廊,該走廊最窄處只有23公里,旁邊被尼泊爾、孟加拉、不丹三國包圍,而洞朗就在錫金和不丹之間。即係話,假如發生戰爭,中國只要稍為南下封住西里古里走廊,印度東北面嘅阿薩姆邦等地區會立即被割裂成飛地。時間一耐,情勢有異,則隨時不復為印度所有,所以印度咁緊張。

現時爭議嘅洞朗地區,中國同不丹都宣稱擁有主權,其實唔關印度事。然而現實兩個情況,其一不丹向來親印度,中國近年在經貿上不斷拉攏不丹,其二則係前述地緣政治問題,中國要喺洞朗起鐵路,印度就企出嚟話撐不丹同中國爭洞朗地區。

9月之所以係今次中印之爭關鍵,蓋洞朗地區印度稱為多蘭高地,海拔高達3,500米。踏入9月就會開始落雪,不宜有軍事行動。所以要開拖,9月前就打;9月前都唔打,就九成都打唔成。《環球時報》有專家指中國或兩星期內行動,其用意在此,想印度9月前撤退。9月前退,係一方先退;9月後退,係氣候問題兩國齊退,國格表現上不同。

在中國提出一帶一路後,印度亦提出香料之路,欲與亞歐31國建立緊密貿易關係。用意十分明顯,就係當中國經濟崛起想做亞洲區大佬時,印度話唔好當我透明,我都係文化古國、大國。十九大即將召開,要爭,就趁共產黨內鬥周身唔得閒時爭。估計印度亦有盤算,賭你共產黨十九大前唔敢大動作。

中國搞一帶一路唔係純粹想振興貿易,而係想全世界習慣用人民幣,具體可見舊文《中國破局之四大貨幣》。喺咁樣嘅情況下,周邊小國對中國依賴度越來越高,印度對周邊國家如斯里蘭卡、不丹影響力漸下,自然會諗方法反制。印度嘅盤算恐怕係,中國一旦開戰,一帶一路就難行,你夠薑就試吓?

迷失世代在眼前


中國是否在重蹈80年代末日本覆轍?近日《明鏡網》透露,海航集團已被當局列入「金融反腐」調查名單中,連同安邦保險、明天系、大連萬達、上海復星,五大集團的海外併購相繼受限。就喺呢個時候,復星郭廣昌發文《走出去是為了更好的回來》,國務院新聞辦公室亦發佈商務部報告《上半年對外經貿運行良好非理性對外投資得到有效遏制》,三者相映成趣。

日本經濟迷失三十年,但有一個事實不能忘記,就係日本地產神話爆破後,自1991年起計,日本持有嘅海外資產從來都係世界第一。據日本財務省統計,2016年底日本持有嘅海外資產淨值達到349萬億日圓,連續26年,連第二都未試過。錢太多出去買嘢好正路,但要睇手段同時候。80年代正值日本炒樓狂潮,大企業如同今日嘅中國不斷海外併購。然而當日本地產神話爆破後,出咗去嘅錢唔會返嚟,造成資產在外,負債在內,係日本經濟一沉不起嘅重要原因。

中國正處於人民幣轉型期,若人民幣想脫離以外滙為發行基礎,人民幣真正值咩價,要等市場釐定。正因為呢種不確定性以及各種政治因素,有錢佬未出發先興奮,都係走先。於是形成一種現象,就係過去幾年叫人愛國嘅真正含意,係我可以走,你唔好走。叫人愛國者走得最快,真正想愛國的或受牢獄之災。

2013年《經濟學人》有一期封面係習近平着住龍袍,大題《Let's party like it's1793》。1793年馬戛爾尼訪華,兩年後乾隆駕崩,清朝由盛轉衰;另一邊廂歐洲則正經歷法國大革命。《經濟學人》似乎暗喻中國正由盛轉衰,誠然,如果中國重蹈日本覆轍,迷失世代近在眼前。
近年各種收緊政策出台,即想將局勢箍緊。高壓容易,引導困難,人人明白。當見到凡事想以高壓了斷,其實反映已經冇時間或冇計。


央行通縮奇應丸

http://hk.apple.nextmedia.com/financeestate/art/20170725/20100263

幾盞聚光燈射住,等待美國聯儲局及歐洲央行從八寶袋拿出通縮奇應丸。紐約聯儲兩星期前出咗份報告《Projections for the SOMA Portfolio and Net Income》,SOMA係指系統公開市場賬戶(System Open Market Account),亦即預計聯儲局縮減資產負債表的路徑點行。

整份報告預計縮表路徑,可概括為大、中、小三個結果:假設最終聯儲局負債規模較大,資產負債表會提前至2020年第一季度正常化,屆時的投資組合規模為3.5萬億(美元,下同);喺中等情況下,投資組合將於2021年第四季度正常化,屆時投資組合預計為2.9萬億;假設最終聯儲局負債規模較細,資產負債表會延遲到2023年第三季度正常化,屆時投資組合規模為2.4萬億。

唔止美國,歐洲央行及日本央行亦準備要停QE,QE係有盡頭。QE要買債,但市場上嘅債券有限,央行最終會被QE之環箍住自己。歐洲及日本央行雖然未公佈停QE,然而都面對即將無債可買嘅窘局。

歐洲央行因為要按資本額比重買政府債券,例如歐元區內德國經濟體最大,德債要買最多。據巴克萊估計,如果歐洲央行維持現行買債計劃,10月就會觸及33%的德國債券持有上限,除非改規則,否則歐洲QE只剩下3個月玩。

日本亦唔好得幾多,日本央行已經買起市場上流通嘅40%日本國債。銀行本身都要揸住部份國債,一般而言,街上要有50%流通量先夠。故日本央行就算話無限QE,實際上只有10%可買。日本央行本來話每月買80萬億日圓國債,但近期每月只買入約60萬億日圓。因此如無意外,美歐日都大機會9月拿出通縮奇應丸,分別公佈縮表及停QE。

2017年7月19日 星期三

中國大兼併策略


http://hk.apple.nextmedia.com/financeestate/art/20170718/20092752

東方海外(316)嘅標誌係一朵梅花,中華民國國花亦係梅花。東方海外創辦人董浩雲確是一代奇人,一生遊走於台灣、美國之間,韓戰及越戰時其船隊更為美國補給後勤物資,留下與美國關係良好此一重要資產。可是董浩雲過世後,東方海外財政開始出問題,最終由霍英東出面幫忙,自此董家改為親共。由董家改變政治立場到賣盤,其實就反映呢30年世家大族嘅此消彼長。

現時全球航運版圖,由三大聯盟瓜分。業內兩大巨頭馬士基(MAERSK LINE)同地中海航運(MSC)組成的2M聯盟;法國達飛海運集團、中遠海運、長榮海運、東方海外組成大洋聯盟;赫伯羅特、川崎商船、商船三井、日本郵船、陽明海運組成THE Alliance。

據《華爾街日報》報道,三大聯盟在主要航線所控之運力比重,無論由亞洲往返歐洲航線,還是由亞洲往返北美航線,都超過90%。聯盟之間不少資源配套可以共用,聯盟以外嘅細公司將非常難生存。

根據法國航運諮詢機構Alphaliner數據,三大聯盟共11家公司,其20呎貨櫃運力佔全球75.8%。值得留意嘅係,當中遠海運併購東方海外後,其20呎貨櫃運力會變成11.5%,剛好超過第三大航運公司法國達飛海運集團。

法國達飛海運集團、中遠海運、東方海外本身已處於大洋聯盟中,點解中遠仍要併購東方海外?或許就係上述原因,中遠躍升為第三大航運公司後,就可以喺聯盟內爭奪話語權。

據倫敦投行Grisons Peak統計發現,過去一年(截至6月),中國企業總共公佈咗對9個海外港口投資計劃,總金額達到201億美元,去年同期只有99.7億美元。都係嗰句,這是中國的大兼併時代。雖有報道指董建華唔多想賣盤,真假不得而知,但無論如何,董生你還有黨。