2017年11月1日 星期三

中國金融外交出爐

https://hk.finance.appledaily.com/finance/daily/article/20171031/20200024

習近平任內將外交提升到國策的核心層次,只意味一件事,就係中國準備對外拓殖。現時我哋奉行嘅國際金融秩序係按照美國規則,外匯以美元為定錨,期貨定價權主要掌握在美國幾大交易所手上,各國利率要睇美國頭。通俗啲講,球證、旁證、主辦單位都係佢嘅人,點同佢鬥?

過去中國奉行韜光養晦策略,未夠撼時先退避三舍。然而習近平任內多次提到「自信」兩個字,即係話有啲事不單止不須再退避,反而要開始對外輸出中國模式。奧巴馬在任時力推TPP戰略,要聯結各國將中國摒除在外;習近平要搞一帶一路,反拉各國入場揚言有錢齊齊搵,美國不在名單之內,也就係現代版的合縱VS連橫。然而特朗普上任後有孤立主義傾向,各種事以美國優先,他國之事美國盡量縮。如果美國繼續TPP戰略,美國規則將會延續。一旦美國轉向孤立主義,美國退下來的空間要有人填補。中國,就係想食呢個空間。

因此中國瞄準各種金融秩序,現時各種迹象顯示,中國會先從期貨定價權落手。過去中國期貨市場落後,無半點牙力。隨住中國期貨市場制度慢慢建立,交投量步步進逼國際市場,累積到某個臨界點,外資想賺錢要入中國市場,入嚟中國就要用人民幣。所以期貨市場係一個缺口,量變會導致質變。假如將來最大的石油期貨交易在中國,結算必定要用人民幣,則石油美元體系將受到直接衝擊。

其次係中國資本輸出。要建立一套嘢並慢慢做好,對中國有難度。但要抄一套嘢到七成似,中國最快。直接買起或入股世界上已經做好的機構更係捷徑,往後我哋將見到越來越多跨國大公司,其幕後金主都有中國身影。麥當勞中國公司改名金拱門,網民笑謂有種六與八之間的味道,但大趨勢是呢種事陸續有來。

港股欠最後一升

https://hk.appledaily.com/finance/art/20171024/20192843

恒指徘徊27000至28000點已近三個月,適逢今年為「7」年,1987年股災、1997年金融風暴、2007金融海嘯,10月都是股災或見頂月。加上聯儲局開始縮表收水,歐洲央行亦很大機會要公佈縮減QE計劃,相信很多人都會躊躇,港股係咪已見頂?

10月的確有啲邪,從統計上,美國道瓊斯指數100年來,16次最大的單日跌幅,有9次都發生在10月。即係話,一係唔跌,只要大跌,有9/16機會都發生在10月;而呢9次當中,有4次發生在逢7之年。唔係一次半次,而係美國股市近100年歷史數據統計。美股升香港可以唔跟,但美股大跌香港多數跟到十足。不過一體兩面,逢7之年10月的背面,也往往代表指數見最後一升之頂。

央行收水縮表方面,聯儲局今年底前每月縮表100億美元,估計歐洲央行就算宣佈縮減QE早期力度亦細,對市場影響不大。聯儲局縮表及美國稅改美元回流的威力,要明年中後先顯現,此部分日後再談。

恒指雖然升穿2015年大時代高位,但有兩個板塊仍然未郁。一個係電訊業,另一個係能源業。電訊業睇落冇乜增長潛力,現在有時甚至被當作公用股睇。但電訊業佔恒生指數比重6.33%,恒指一係唔升,恒指要再爆上的話,最終都會炒起藍籌電訊股,唔需要甚麼理由,只要用嚟挾指數就夠。

另一個落後板塊為石油業,包括石油同天然氣相關的。今年提過幾次美國的能源布局,石油同天然氣價格已經見底,現處於易升難跌趨勢。石油及天然氣藍籌股佔恒生指數比重5.26%,同樣地,恒指要挾上去的話,始終會郁石油股。因賭期油而輸到仆直的國泰航空(293),近期股價亦靜靜起革命。上述兩個板塊夾埋佔恒指比重11.59%,若見其開始郁,那最後一升應該嚟料。

中東火藥桶待爆

https://hk.appledaily.com/finance/art/20171017/20185695

據伊拉克衛星電視台報道,伊拉克軍隊同庫爾德武裝喺基爾庫克有衝突,消息傳出後油價急升1%。事緣9月25日伊拉克庫爾德自治區舉行民族自決公投,92.7%伊拉克庫爾德人贊成庫爾德族自治區獨立。

世界上有一個民族人口達3,000萬,但冇國家,是「冇國家的民族」中人口最高的,嗰個就係庫爾德族。庫爾德族有3,000萬人,但並非集中一處,而是主要分散於伊拉克、伊朗、土耳其、敘利亞四國境內。今次公投獨立的,即伊拉克境內的庫爾德人。

庫爾德族3,000萬人口係乜嘢概念?中東四大民族:阿拉伯、突厥、波斯、庫爾德,庫爾德排第4。人口咁多嘅民族,卻冇一個屬於自己的國家,就係因為庫爾德人太分散。今次伊拉克庫爾德族自治區要求獨立,伊拉克強烈反對,因為早前同ISIS作戰時,庫爾德人實際掌控了基爾庫克省。伊拉克全國每日產油量430萬桶,其中基爾庫克油田日產100萬桶,佔伊拉克全國石油產量23%,伊拉克當然唔會放手。周邊國家如土耳其亦強烈反對庫爾德人獨立,原因好簡單,因為有1,400萬庫爾德人生活於土耳其國境內。伊拉克庫爾德人一獨立,住喺土耳其嘅庫爾德人亦會要求獨立。

在金融方面,嚟緊我哋很大機會面對一個大變局,就係石油美元體系迴路之逆行。在此背景下,油價唔會好似早兩年咁弱勢跌到30美元。庫爾德人最後會否獨立,唔知道,在現時國際形勢下,周邊每一國都會為自己盤算而抵制其獨立。但只要局勢陷入拉鋸,少少消息都會成為支撐油價的藉口。美國通脹升唔起,其中重點在能源價格低。一旦油價回升,美國現時表面的低通脹數據會立即反轉。耶倫在G30國際銀行研討會上表示,通脹疲弱情況不會持續,未來幾年適宜漸進加息,相信即同能源價格變動有關。

暴風雨前的寧靜

https://hk.appledaily.com/finance/art/20171010/20178212

10月5日特朗普喺白宮會見軍方高層,揚言軍方精英齊集。會前佢先同記者講,伊朗唔符合「核協議的精神」,會後突然又同記者講,指現時係「暴風雨前的寧靜」。如推斷無錯,其所謂的暴風雨將是伊朗問題,而伊朗問題,也就係石油及天然氣問題。

另一邊廂,10月4日沙特阿拉伯國王薩勒曼訪問俄羅斯,同普京討論中東局勢及能源問題。此次訪問的重要性在於,蘇聯1926年係第一個承認沙特國王的國家,但91年來,沙特國王從來未訪問過蘇聯及俄羅斯。今次係91年來沙特國王首次訪問俄羅斯。

現時中東局勢一個大背景我哋要先明白,俄羅斯、伊朗、敘利亞乃鐵三角,俄、伊兩國一上一下夾住高加索能源走廊,為兩大睇場;敘利亞位於地中海沿岸,是能源能否順利出口到歐洲的關鍵,此其一。自1974年後石油美元體系建立,沙特可謂石油美元的代理人。在敘利亞問題上,沙特同美國同一陣線,支持敘利亞反對派,而美國長期在軍事上支持沙特防備伊朗,此其二。

兩邊各有各利害關係,原本涇渭分明,但呢種關係幾年內相信會有重大改變。美國最快2020年開始會成為能源出口國,過去美國靠入口原油時,沙特負責穩定石油美元體系,大家有錢齊齊搵。但當美國要自己攬嚟做時,其他做緊嘅人都要讓路。正是呢個原因,近年沙特同美國開始貌合神離,沙特國王歷史性訪俄,更具有標誌性意義。

全球所有已知石油蘊藏量,伊朗佔十分一,伊朗天然氣資源亦排世界第二。美國要食出口能源呢口飯,第一件要做的事就係諗計限制其他人出口。天然資源匱乏的國家羨慕中東,鑽吓油就有錢,但中東百年紛亂亦因石油。匹夫無罪,懷璧其罪。

QE是一場春夢

https://hk.appledaily.com/finance/art/20171003/20171412

聯儲局主席耶倫上星期在美國商業經濟協會發表演說,雖然談及美國貨幣政策仍然時鴿時鷹,但透露了一個重要信息。耶倫講咗一句,話佢同聯儲局同事可能誤判了勞動市場、通脹預期,以及推動通脹的力量。耶倫呢句話其實係講緊菲利浦曲線(Phillips Curve)。

所謂菲利浦曲線,用最簡單講法,即失業率同通脹之關係。失業率低,通脹會高;失業率高,通脹會低。

過去聯儲局嘅貨幣政策,很大程度上參考菲利浦曲線制定。所以伯南克在任時,最初定下只要通脹率未到2%,貨幣政策保持寬鬆,除非失業率跌到6.5%以下先開始加息。美國失業率已經跌到4.3%,係近16年來低位,通脹卻無起息。於是耶倫質疑,菲利浦曲線係咪唔掂?

事實上菲利浦曲線有其局限性,威廉.菲利浦1958年根據1867至1957年英國的失業率和工資變動,提出菲利浦曲線。可是我哋都知道,70年代後美元同黃金脫鈎,今日嘅貨幣系統同50年前已經唔同。所以60年代末弗里德曼等經濟學家已提出質疑,可以話得出一個共識,就係菲利浦曲線用作短期預測有效,長期無乜效。

聯儲局由2009年開始QE至今年縮表,前後9年貨幣政策保持寬鬆,失業率一路跌,通脹唔升,9年係短期定長期?耶倫嘅講話似乎意味9年已算長期,因此佢演說時提出,美國經濟數據就算稍弱,息都照樣要加,資產負債表照樣要縮。若維持貨幣政策不變只求等通脹回升至2%,係輕率的做法。由佢講完開始,美元指數及美國債息開始扯上。事實上美元萬劍歸宗蓄勢待發,特朗普稅改已在議程。縮表同美元回流必須同時做,不再重複。

FED還原靚靚拳

https://hk.appledaily.com/finance/art/20170926/20164536

一條經常聽到嘅問題:價格和價值之分別。價格係銀紙堆出來,再垃圾嘅嘢,只要無止境濫印銀紙,佢都會有價。生活上需要銀紙交易,我哋習慣了以價格衡量價值,於是出現一種現象,就係容易讓人以為價格高即有價值,貴就係靚。

金融海嘯後以美國為首啟動QE,海嘯前FED資產負債表規模不到1萬億(美元,下同),今日已擴張至4.5萬億,多咗3.5萬億。以美國貨幣乘數約3估算,市場上多咗10萬億。呢10萬億湧去股金樓債各類市場,加上各國亦緊接QE,時間9年,讓人習慣了各類資產今日口價,代表了佢值咁多錢。

FED公佈了今年10月開始縮減資產負債表,起初以停止再投資方法令資產負債表被動收縮。由10月開始至年末,每月縮100億,當中包括60億國債及40億MBS。縮表進程每3個月加100億,簡言之,2018年四個季度的縮表進程,分別為每月200億(第一季)、300億(第二季)、400億(第三季)及500億(第四季)。到2019年,每月維持縮表500億。因此2017年FED總共會縮表300億,2018年4,200億,2019年6,000億,3年合共縮表1.05萬億。

據FED自己預計,縮表規模最低限度係要縮至3.3萬億,最多縮至2.4萬億。故整個縮表進程,最快2020年完成,最慢2022年完成。每月縮表100至500億係乜嘢概念?以美國QE3為對比,QE3每月買債850億。縮表時市場上不再有量化寬鬆新增資金之餘,每個月還要唔見100至500億,錢越來越少,進入易跌難升格局。

當市場上游資總存量減少時,資產價值就會開始凌駕資產價格。錢太多時錢追資產,垃圾資產都吊高嚟賣,等同中了面目全非腳。錢減少時資產要以其價值吸引錢過嚟,優質資產同垃圾資產被壓平之價差會再顯現,亦即使出還原靚靚拳。

2017年9月20日 星期三

Bitcoin風暴背後

http://hk.apple.nextmedia.com/financeestate/art/20170919/20157269

今年2月最後一個交易日對Bitcoin有象徵意義,因為一個Bitcoin價格正式超過一盎士黃金。唔少人驚問:呀哥,虛擬嘢嚟,點會貴過黃金?到今年8月,一個Bitcoin已超過5,000美元,比2月底價格升近4倍。但5,000美元已係近期個頂,近日內地掀起數字貨幣監管風暴,Bitcoin一度跌穿3,000美元。據內地媒體報道,火幣網、OKCoin負責人現時已不得離開北京。

繼內地最大的數字貨幣交易平台比特幣中國停止營運後,第二及第三大的交易平台火幣網和OKCoin分別公告,表示將停止所有虛擬貨幣交易業務。至此中國三大數字貨幣交易平台相繼停止業務,數字貨幣在中國嘅發展終結?其實正正相反。

海耶克晚年最後一本經濟學著作,叫做《貨幣的非國家化》。如果經濟學家們相信自由競爭係最好,咁貨幣發行亦應該自由競爭,唔應該由央行統一發行。海耶克當日提出呢個構想時看似天方夜譚,但其構想今日開始見到眉目,也就係數字貨幣的出現。

數字貨幣一個重心係去中心化,每個人只要有部電腦就可以挖礦。但貨幣非國家化,衝擊政權控制貨幣之權力,就好似叫獨裁國家實行民主,當然唔會畀你咁順攤發展。中國嘅做法係如果有得做就我攬嚟做,當數字貨幣發展如火如荼之際,交易平台被下令關門,也意味着由央行自己搞嘅數字貨幣將要出現。

科技發展會改變我哋嘅生活形態,但新科技能否風行,還要時勢配合。最典型例子是平板電腦,第一部出現於1989年,然而硬件、軟件、網絡各方面跟唔上,平板電腦好快便成為失敗產品。2000年後平板電腦再出現,硬件、軟件、網絡各方面已經配合,結果順勢發展飛快。海耶克嘅構想冇錯,只係其思想比同時代嘅人早了40年。

人民幣短期見頂

http://hk.apple.nextmedia.com/financeestate/art/20170912/20150210

人民銀行公佈自2017年9月11日起,外滙風險準備金率下降至0%。由2015年811滙改開始,全世界睇人民幣跌。所以該年8月31日,人民銀行將外滙風險準備金率由0%一下提高至20%。所謂外滙風險準備金率,即係當有客同銀行買遠期外滙時(主要係美元),銀行要留20%外滙做準備金。呢20%可以係銀行現價買定,可以喺市場上借入,但無論用咩方法都代表銀行有利息成本。好自然地,銀行就會將成本轉嫁畀客,也就係遠期兌換價唔靚仔。

人民幣貶值預期出現時,大陸主要做三樣嘢:其一係挾拆息,離岸市場久唔久挾到過百釐殺晒淡友,反覆三幾次後等你唔敢沽。但呢種做法只能偶爾為之,反作用力好大。其二喺遠期美元落手,利用遠期美元令當下嘅外滙佔款表面睇落冇跌,等人以為大陸走資已經告一段落。其三即上述外滙風險準備金率,人民幣貶值時個個想換外滙,透過提高銀行成本令遠期外滙價唔靚,削弱人買外滙意欲。

今浪人民幣兌美元由6.9升到6.45,升近7%,唔係人民幣轉升,而係美元轉弱。美滙指數由103跌到91已經11%,從比例可見人民幣並無跟足升11%。美元轉弱主要來自聯儲局出現史無前例嘅大變動,聯儲局理事目前會有三個空缺,副主席費希爾剛剛又話劈炮唔撈,令7名理事出現4個空缺,加埋主席耶倫明年任期屆滿。輿論認為有利特朗普推自己人上,如果係咁都還好,起碼明確。可是特朗普自己白宮幕僚都保唔住,聯儲局容得下佢插手?存疑。正是這種不確定性令美元轉弱,但從技術走勢而言美滙指數91係觸底位,開始反彈機會很大。另聽朋友講,人民幣貶值期間,USD/CNY Capped Forward好賣得,唔少價位簽定在6.35以上,值得留意。

金正恩強國野心

http://hk.apple.nextmedia.com/financeestate/art/20170905/20143399

朝鮮導彈射得遠還是中國導彈射得遠?朝鮮核技術成熟定中國核技術成熟?如果美國視朝鮮擁有核武為威脅,枱底下無可能唔對中國防一手。金正恩,或說朝鮮軍政高層對此情勢當然十分了解,因此嚟一次鬥大膽遊戲,游刃於此情勢之間,如果成功,有望步向強國之路。

美國在東北亞盟國部署防禦朝鮮嘅軍備,今日可以防朝鮮,聽日可以用嚟防中國。但美國同中國經貿千絲萬縷,中國亦持有大量美債,如果擺明車馬話要插旗防中國太難睇,因此朝鮮嘅軍事威脅就需要存在。金正恩就係睇準呢個空間,順勢加快發展核武同長程導彈技術。

一場時間競賽,美國在盟國插旗,要傾要講,唔係通行無阻。在討價還價期間,朝鮮加速發展核技術。如果在美國完成部署前,朝鮮先完成核技術發展,到時就吹金正恩唔脹。

因此美國嘅底線係朝鮮核技術唔可以太成熟,以及其洲際導彈技術唔可以射到美國。在接近上述情勢前,開戰機會唔大,但戰爭離我哋越來越近。朝鮮奉行先軍政治,即無論如何軍事優先。但是常規軍備要教育同錢長期積累研發,朝鮮冇呢個本錢。在金正恩角度,餘下的唯有非對稱戰略一途。

五十年代韓戰同台海危機期間,美國曾兩度以核武威嚇中國。毛澤東意識到如果無核武始終要睇人面色,於是開始發展核武。核武係用嚟靠嚇,因為擁有核武代表可以同對方攬炒。毛澤東明白,金正恩也明白,此為非對稱戰略最重要一步,今時今日另一重要手段則係黑客。
金正恩想走中國六十年代舊路,先以核武奠定朝鮮,或說金家嘅國際地位,然後再諗發展經濟等問題。

佢不甘於朝鮮只作為一個附庸國,要嘅係能夠同他國並起並坐的地位。金家皇朝最後會倒台,還是會開闢出一條新徑,十年內我哋應該會見證。

石油新周期將至

http://hk.apple.nextmedia.com/financeestate/art/20170829/20135999

世界上有兩壇生意經營上可以由私人公司管,但大方略要國家級先玩得起,一個為軍火,另一個為能源。所以任何經濟解釋都嘥氣,長期還看政治。美國快則2018年,慢則2020年會成為原油出口國,呢個佈局並唔會因為特朗普做唔做總統而改變。要賣嘢,最理想當然係件貨賣到有咁貴得咁貴。

據國際能源署數據,石油輸出國組織(OPEC)佔全球原油產量42%。在實物供需上,OPEC掌握定價權。但在金融操作上,美國掌握期貨定價權。兩者之較量在於,期貨可以快速決定邊際價格,即最後一口價就係市價;可是去到最後還要看實物供需,否則會出現有價冇市或有市冇價情況。

OPEC自己估計,全球原油需求嘅邊際產量係每日100-150萬桶,因此只要齊心減產100萬桶,原油供需就大致平衡,唔會因供過於求令油價下跌。另一邊廂,美國今年2月、3月平均每日出口110萬桶及83萬桶原油,剛好抵銷OPEC減產量。一個基本概念要先明白,美國一直都係產油大國,只係過去產油自己都唔夠使,直到頁岩油技術出現後,美國先開始產油多到夠出口。因此過去國際上原油嘅賣家市場,美國無份。

面對OPEC和俄羅斯坐住42%及14%國際原油市場份額,美國要食呢口大茶飯,就必須要令你撕裂。只有產油國之間出現撕裂,美國先有空間插針。最好方法就係令油價大跌,當跌到大家頂唔順,就會有人唔想守協定。油價大跌逼使原油坐莊國減產,呢個就係空間。

技術走勢上,油價由過百美元腰斬兩次,跌到24蚊已見底。之後非常容易反彈一個開到50蚊並盤底兩三年。現時為盤底期,新底位估計40蚊左右,好難再見3字頭。由40-50蚊間繼續徘徊,逢見油價逼近40蚊便可考慮收集等新周期趨勢。